VHS del në pension

Me shitjet e fundit të kasetave VHS, në fund të dhjetorit 2008, ka dalë në pension formati Video Home System (VHS).
Tregimi për formatin e popullarizuar nis prej para 30 vitesh kur JVC kishte fituar ndaj kompanisë Sony në “luftën e kasetave”, e standardi VHS kishte zëvendësuar kasetat e deriatëhershme Betamax, të cilat ishin të popullarizuara në Evropë e Azi.

VHS ishte më i mirë se Betamax në pothuajse të gjitha rrafshet (pos kualitetit dhe riprodhimit të fotografisë) edhe shumë prodhues kishin vendosur të kalojnë në standardin e ri për shkak të shpenzimeve më të ulëta.

Sot, standardi VHS është duke humbur luftën në tërësi, sepse lojtarët më të mëdhenj në treg (siç janë Blu-ray HD) po e marrin primatin dhe pak kanë mbetur prej atyre të cilët në shtëpitë e tyre kanë video rekorderë të cilët i përdorin përditë.

Pyetja e duhur, në këtë moment do të ishte çfarë të bëjmë me ato video kaseta të cilat i ruajmë. Shumë prej tyre përmbajnë informata të dobishme. Ka ardhur momenti që të gjitha ato që i keni në kasetat VHS t’i bartni në mediumet DVD.
Kështu do të lironi hapësirë, të përmirësoni kualitetin e materialit të incizuar, por edhe të ruani materialin i cili do të shkatërrohej në kasetat e vjetra.